In opdracht van de VVV in Appelsche bin ‘k op dit stuit drok doende om een verhael vanuut toeristisch perspektief te schrieven over de dattien dörpen in de gemiente Stellingwarf- Oostaende. Da’s echt een eupenbaoring. Want niet alliend bekiek ie zoe’n dörp mit hiele aandere ogen, et vaalt ok op dat bi’jkaans elk dörp wel een bield het, dat as wat vertelt over de eigen geschiedenis. En dan he’k et hier nog niet iens over al die bielden die as daor niks mit te maeken hebben zoas bi’jgelieks “De parende Slakken” in Berkoop. In elk geval het de geite, de aarme lui’s koe, in et centrum van dat dörp wél wat mit de geschiedenis te maeken, liek as “De Melker” in Langedieke en “Het haren van de zeis” in Ni’jberkoop: een bezighied waor as de kiender van vandaege-de-dag echt gien weet meer van hebben. In Makkinge staot “De Piepe”, een herinnering an de oolde zuvelfebriek en et appatte bield “De Hunningdaenker”, dat (oorspronkelik) mit een mond vol zoemgeluden van een bi’jeklonie in de buurt, herinnert an de imkers in dit gebied. In Donkerbroek staot ok zoe’n heerlik appat bield van de klokkeluder, dat as herinnert an et jaor 1749, doe opscheuten jongen de bevolking waorschouwden veur de komst van de belastingambteners. Dat kon blieber wel uut want d’r is now 250 jaor laeter zels een staandbield over maekt. Ok “De balderende Korhoenders” op ‘e Fochtel wi’k hier niet vergeten.
Kommen we bi’j “De Trilker”in Waskemeer. Da’s een man die vanof de kaant mit een lange stok een boot veuruut douwt. (D’r was gieniene die as me dat vertellen kon). “De Veengravers” staot in Raevenswoold en in Haulerwiek staot “Een veenarbeidersgezin in de 19e ieuw”. Daor zit echt van alles in: de aarmoede, mar ok de zorg om de kiender en de vader die as mit de turfscheppe in de haand et nauweliks waachten kan om even bi’j zien gezin te wezen. Prachtig. De lieste van keunstwarken zal ongetwiefeld nog vule langer wodden kunnen, mar ik hadde now al muuite om dissen allemaol te vienen. In elk geval is ien ding mi’j wel dudelik wodden. Mit zoe’n permanente Eupen Stal is et verrekte zunde dat daor zo weinig mit daon wodt.
.......