Oolder wodden is een keunst, Want wat moet een meenske allemaole wel niet verdregen veur hi’j de zegende leeftied van tachtig of meer berikt. Aj’ daor es bi’j stille staon slat de schrik je wel es om et hatte. Laot ik es vrolik doen en de zaeke es op ‘e riege zetten. In elk geval kriegen we last van botontkalking. Ja, misschien moe’n we zels wel hielemaole in de revisie en veerder mit een peer keunstheupen. Et gezicht en et geheur wodt minder. Now hebbe ik al een brille, mar ik hope waratje dat mi’j zoe’n toetend geheurapperaot zo lange meugelik bespeerd blift. He’k et nog niet iens over et onthoold had. Wus ie gister nog krekt waoras de sleutel van de veurdeure lag, now kuj’ him mit gien meugelikhied vienen en ok de naemen van meensken, die aj’ al jaoren kennen, bi’j zomar glad vergeten. En dan te bedaenken dat dit veschiensel him bi’j mi’j al jaoren veurdot. Ik vreze et argste.
He’k et nog niet iens had over de prostaattklaachten en erectiestoornissen bi’j oons manluden. Hej’ jaorenlaank et keunsien zonder muuite vertonen kunt, verrekt dat ding et inienend om te doen wat ie aanders altied dee. Gien wonder dat ooldere meensken soms last kriegen van hatkloppings. Mar goed, ok disse potente jongkerel van zesenvuuftig hoeft himzels niks wies te maeken: ok bi’j mi’j is et verval an de gang. Ja jaoren leden al wodde ik mi’j pienlik bewust dat et beste d’r of was, doe ik bi’j de triatlon in Berkoop veur et eerst deur een jong maegien uut et dörp versleugen wodde. Een frustraosie. Gelokkig geft datzelde maegien mi’j de leste peer jaor weer een protte voldoening. Want dat jonge dinkien is now een volwassen vrouw, hiet Anita Looper en is now al veur de dadde keer Nederlands kampioene op de vuuf kilometer. Een prestaosie van fermaot. En alliend dat feit al zorgt bi’j mi’j veur een vule positievere zels-evaluaosie, om dat muuilike woord mar es te bruken. En ik vertelle de leste jaoren dan ok mit trots da’k et een keer krap verleuren hebbe van een Nederlaans kampioene. Ja mit zokke argementen is d’r einliks gien keunst an om et oftaekelen een plakkien te geven.
.......