Hè, hè. Et het lange duurd, mar de zoemervekansie is now dan toch einliks veurbi’j en die was dit jaor veur mi’j “heavy”, al zeg ik et zels. En dat kwam echt niet alliend deur die bi’jkaans 8000 kilometer die a’k op oonze tocht naor de Noordkaap reden hebbe.
Mar lao’k bi’j et begin beginnen. Et is naemelik zo, dat as de vrouw en ikke op vekaansie binnen we een dudelike taekverdieling hebben. Ik riede en zi’j lest de kaorte. Proefondervienlik hebben wi’j murken dat dat de beste meniere is om onderwegens gien ruzie te kriegen. En as wi’j argens binnen kookt zi’j eten en waske ik of. Daor konnen wi’j tot veur kotten beidend uutstekend mit uut de voeten. Mar now het zoe’n verrekte Duutser et mi’j daor in dat hoge noorden mar zwaor maekt. Ik leup naemelik lessendaegs op een kamping in Noorwegen mit mien ofwaste spullegies van et keukentien naor mien kampertien, doe ik anspreuken wodde deur een rondbostige man, die rustig op ‘e klapstoel veur zien caravan zat. Meer gaasten weren d’r ok niet en ja dan het iene wel es behoefte an een praotien now. “Sie sind ein gut erzogener Man (een goed opvoede man), zo sprak hi’j mi’j an en keek daorbi’j mit een minzeme glimlach om ‘e lippen naor mien schone spullegies in et ofwasblikkien. Ik mos de opmarking even tot mi’j deurdringen laoten, mar doe ‘k et einliks in de gaten hadde, staemerde ik in et halfbakken Duuts da’k “ein emancipierter Man” was. Now hi’j was mar wat bliede dat hi’j niet emancipeerd was, zee hi’j en zakte nog wat tevredener aachterover in zien klapstoel. Aende gesprek, mar ik begon wel prompt an mi’jzels te twiefelen. Zien vrouw kookte niet alliend, mar waskte ok nog of. Ha’k et now zo min troffen? Even laeter besprak ik et veurval mit mien vrouw, omda’k d’r toch wel wat mit zat. “Och,” zee ze, “ ie hoeven echt niet meer of te wasken heur, dat wi’k graeg van jow overnemen, as ie dan mar eten koken.” Ik hebbe nog even een jeloerse blik wurpen op mien heerlik in et zunnegien zittende kollega kampinggaast en doe mar zochtende bekend da’k toch liever ofwaskte.
.......