Geel
Ik was te vroeg in de boekwinkel van Binnert Overdiep in Et Vene, want ze hadden daor veurige weke deensdag nog nooit heurd van et boek “Geel” van Mart Smeets. “Hiet et boek gien “Oranje”? vreug de vrouw waor ik inlochtingen kriegen kon. Ik keek heur een mement an en dochte: “Et zal niet waor wezen. Dat zels zoe’n aorig vrommes, die uterlik niks het van een voetbalsuporter en de degelikhied zelve uutstraolt, now ok al besmet is. “Nee”, zee ik, “et gaot in dit geval niet over voetballen, mar over de gele trui dregers in de Tour de France.” Ze typte nog wat op ‘e komputer omme en wus mi’j even laeter te vertellen dat et boek pas vanof 8 juni in de winkel lag. Ik was gewoon een peer daegen te bi’jtied.
Thuus kommen, he’k op internet “Geel”en “Mart Smeets” opzocht om nog wat over et boek en zien opvattings te lezen. Ik wodde daorin niet teleursteld. In een interview mit Sportwereld, de grootste sportkraante van Vlaanderen, vertelde hi’j wat over de inhoold, mar ok over de oranje gekte. Tiedens et interview veraanderde zels de jounalist van kleur. “Wi’j zuken naor een ekskuus om gek te doen. Ik schaeme me diepe over wat d’r gebeurt. Et is niet grappig. Aj’ now een stadion hielemaole oranje of rood-geel-zwat kleuren, et is beide lieke arg. We maeken oonszels belachelik.”
Now gaot die leste uutspraoke me krek wat te veer, mar ik moete wel eerlik toegeven dat doe mi’j twie weken leden al een auto mit flapperende oranje vlaggen veurbi’j steuf, ik ok wel wat overdreven vun. Ja mi’j bekreup zels even dat onbehaeglike gevuul dat zoe’n opklopt volksvermaek makkelik in een kollektieve volkspsychose veraanderen kan. In Brazilďe, mit zien goddelike kanaries, weten ze d’r alles van.
Mar daenke now niet da’k niet van voetbal hole, want ok disse jonge ligt d’r plat veur as Nederlaand speulen moet. En ok al he’k mien huus niet oranje schilderd en gien oranje vlaggies an de auto, ik trekke wel as et mal gaot, mien mooie oranje klompen an: echte Scherjonsjes, mit een leeuw d’r op plakt. Dan heure ik d’r bi’j. Mar goed, ik belove Mart da’k de volgende keer gele klompen kope.
.......