Lessendaegs bin ‘k me rot schroken. Zitte ik rustig morgens om goed half tiene mit een lekker bakkien koffie op ‘e baank, komme ik al zappend in een pergramme van de schoeletillevisie te lane. Een uutzending over de jongeren in de jaoren zestig, mien jeugd dus. D’r wodde andacht besteed an provo, de demonstraosies tegen de Vietnamoorlog en zels Phil Bloom, de eerste naekte vrouw op ‘e tillevisie, bleef now in dit pergramme veur de schoelejeugd meenstens tien sekonden in bield. Ik daenke dat et sund die tied aorig onrustig is op de begreefplakken, mit al die gezagsdregers uut de jaoren zestig.
Pas tiedens de oftiteling las ik dat de uutzending iene in de riege histoclips was. En dat kwam had an, want de veurige ofleverings gongen over de Romeinen en Lodewiek de Veertiende. As klap op de vuurpielke schreef een maegien: “Geschiedenis bin de verhaelen van dooie meensken en wat moe’n we d’r mit.”
Mar goed, as wi’j dan warkelik al bi’j de geschiedenis heuren, vraog ik mi’j wel of, of de historische verienigings in de Stellingwarven heur tied niet veer aachteruut binnen. In Appelsche tilt et in de Hoolten Klinte nog op van de turfscheppen en de Verieniging Historie Weststellingwarf hoolt him in heur lezings doende mit “de stookhokken in Drenthe’ en “de betekenis der zogenaamde Spaanse legerpotten”. Slim interessaant, mar mit die histoclips in et aachterheufd wodt et in Appelsche tied dat de historische stried van Harambe om et heufd boven waeter te holen es op een schijfien vaaste legd wodt. De Verieniging Historie Weststellingwarf kan jaoren veuruut mit et archiveren en bewarken van bieldmateriaol van de Sokkenbals in Noordwoolde en Tukkel in Wolvege. In Oranjewoold moet et andiel van de Stellingwarvers in de blote kontefeesten neudig es op een clip vaaste legd wodden en in Berkoop mag de archiefkemmissie wel es filmisch uutvoegelen waorom die Geitefokkers daor in 1970 een geite in dat rieke dörp daele zet hebben die as letterlik deur de ribben schieten kan. En dan zwieg ik nog mar over ’t op de gevulige plaete vaaste leggen van alle milieuschaede die as deur de Vesuviusklup uut Else anricht is mit et oftappen van enorme hoeveulheden Lendewaeter veur heur deupgevallen. Mi’j donkt, onderwarpen genog.