Sommige meensken zullen 9 juni in hun agenda anstreept hebben. Ik hebbe 1 juli anstreept. As liefhebber van de et hadfietsen, de Tour in et biezunder, hebbe ik oflopen weke et monument opzocht van René Pottier. Een wielerpionier die een greens deurbrak deurdat hi’j as eerste meens op de fiets over een barg, de Ballon d’Alsace, fietste. Een stunt die as hi’j een jaor laeter herhaelde en waormit hi’j de basis legde veur zien Tour de France-overwinning 100 jaor leden. Et ontroerde mi’j zuver dat disse pionier van et mederne hadfietsen daor zien grootste triomfen vierde, wiels hi’j himzels een jaor laeter van kaant maekte deur warschienlik liefdesverdriet.
Triomf en tragiek kun dichte bi’j mekeer liggen. Dat wet elke voetballer die op ien van de belangriekste mementen in zien voetbalkarrière faalde. Ik hoeve mar Seedorf te neumen en et EK’96 en elkenien wet dat hi’j daormit zien eigen oranje-doodvonnis 2006 tekend het. Want Marco van Basten wil mit Seedorff echt niet herinnerd wodden an zien eigen miste pengel in de halve finale van de EK’92 in Zweden. En wie kent niet de plaeties van Wim van Est doe hi’j in de gele leiderstrui van de Tour op de Col d’Aubisque et ravijn in deuk. Ik bin d’r west en kon me veurstellen dat van Est daor last hadde van een soorte polderbliendhied in de bargen. Et aorige is dat d’r now een plaquette anbrocht is, dat an dat veurval herinnert.
Traogisch is trouwens ok de opkomst en et vroegtiedige stoppen van Tiemen Groen. Vier keer wereldkampioen en vierde bi’j de Olympische Speulen. Mar nog traogischer is dat nargens oons in Frieslaand iets herinnert an disse beroemde hadfietser en dat is spietig. Ja as sportstad Heerenveen wat meer wil wezen dan een schaats- en voetbalstad meugen ze rustig een bieltien van Tiemen onthullen.
Veur René Pottier kwam zien gedaenkstien te laete. Hi’j overleefde de Ballon d’Álsace mit zien col van 1171 meter, mar kon niet op tegen die fietshaoke van twie meter hoge. Mar mit daank an him kan ik douk weer genieten van al die hadfietsers die in 2006 de 22 cols in de Tour zullen moeten bedwingen om krek as René in anmarking te kommen veur ieuwige roem.
.......