Sport, opvalen en draank heuren bi’jmekeer. De overhied kan nog zovule zeggen en d’r nog zovule veurlochtingskampagnes tegenan gooien, mar sport en draank heuren as jing en jang bi’j de sportbeleving.
Onschuldig is de muuite die pattie meensken doen om op ‘e tillevisie te kommen. Carnaval is d’r niks bi’j en ik bin d’r van overtuugd dat mennig couturier stinkende jeloers is op de pattietoeren fantastische kreaosies. Om de feestvreugde te vergroten bin d’r ok nog die botties mitnemen. Daor bin ‘k minder wies mit, want lessendaegs kwammen wi’j aachter zoe’n bod te lane. ‘Wij steunen onze kanjers”, ston d’r op en “buurvrouw bedankt”. Dat was veur de bh, die as hi’j van de buurvrouw liend hadde om et bod wat antrekkeliker te maeken en misschien ok wel om op ‘e tillevisie te kommen. Now kup a of niet, et veurkommen van buurvrouw hul niet over, et is ongeleuflik hoevule energie zoks oplevert: wi’j hadden vier uren lang konstaant een zwaaiend bod veur oonze kop.
Draank maekt grif ongevulig. Zo zag ik een keer drie jongen mit een pilsien in de haand op twie ofvalbakken van van Gansewinkel klimmen. Now van Gansewinkel levert kwaliteit, want ondaanks twie indeukte deksels hebben die bakken et hullen. Tot mien stomme verbaozing greep een veurbi’jganger spontaon iene van die mannen as groet vol in et kruus en slingerde d’r een peer keer best an. De ontvanger van al disse hattelikhied bleef liekewel rustig deurdrinken.
Noren bin ok goed veur de omzet. Een dudelik dronken Noor prikte mien vrouw bi’j een schaatswedstried mit de vinger in de rogge. Et bleek dat hi’j de Noorse trui bedoelde die ze anhad en in oons beste Engels legden we uut dat ze die zels maekt hadde. Mar spietig drong et niet echt deur, want midden onder de uutleg legde hi’j zien heufd op mien schoolder. Nao een kotte roes strompelde hi’j weer naor de bierpompe.
Echt alles is bi’j grote evenementen richt op de bieromzet en da’s vremd mit een overhied die et draankgebruuk terogge dringen wil en toegelieke d’r mit tonnen subsidie veur zorgt, dat wi’j oons in een prachtige entourage volgieten kunnen. Een vorm van indirekt subsidieerd zoepen. “Balkie bedankt (2x), Balkie, Balkie, Balkie bedankt.