Nao de opmarking van premier Balkenende dat we terogge moeten naor de VOC-mentaliteit, kon et niet uutblieven: In de poletiek het now ok et begrip boegbeeld zien intree daon. En ere wie ere toekomt de PvdA in Frieslaand gaot mit de ere strieken om as eerste die woorden in daoden omme te zetten deur Anita Andriessen as zodaonig in te zetten. Een goeie zet, omdat daordeur de andacht veur de rest van et schip wat minder wodt en daor is toch vaeke gien ere mit te behaelen. Vraoge de man in de straote mar es wie as ze kennen en wat ze weten van de provinciaole poletiek en et antwoord is een glaezige blik in de veerte of hakkelend een peer naemen, waoronder nog et vaekst die van Anita. Ja, et zol mi’j zels niet verbaozen as et douk in et Fries Us Heit, Us Mem en Us Anita wodt, wat vanzels wel sneu is veur Sicco Heldoorn en Bertus Mulder die die staotus van “Us” nooit echt berikt hebben. Nee et zal de ere perti’jen nog niet mitvalen om ok mit zoe’n stevig boegbeeld te kommen en ik kan me dan ok best veurstellen dat een man as Ton Baas, die op et middenschip perbeert te redden wat d’r nog te redden is, stinkende jeloers is. Toch zet zoe’n boegbeelde-aktie je wel an et daenken. Hebben wi’j hier in de Stellingwarven ok van die boegbeelden? Op dit stuit niet, al het de ni’je burgemeester van Stellingwarf-Oostaende alles in him om et te wodden: Degelik, in alle opzichten een stevige persoonlikhied, een meenske meens, gevuul veur humor en niet te vergeten een man die boven de perti’jen staot, zoas ok et boegbeeld van een VOC-schip hoge boven et middendek uutstikt. Mar ien ding het een boegbeeld tegen. As et schip op ramkoers gaot of dwongen wodt om te gaon (bi’jgelieks deur de Boerestreken van Jasper en de lange ti’jen in Langedieke) dan is et boegbeeld as eerste an de beurt om de kop kwiet te raeken. Et is dan ok gien wonder dat zovule politici heerlik onbekend op et middenschip ommedangelen. En toch hope ik dat we douk zeggen kunnen: ’t Boegbeeld Harry Oosterman, da’s Oonze man van ’t Oost.