Wat hebbe ik veurige weke geneuten van de klimaotsveraandering. Wat wil een
meens nog meer: tempereturen van boven de 25 graoden en dat halverwege april.
Heerlik. Lekker in et zunnegien, pilsien d’r bi’j en op ‘e dreegbere tillevisie
Paries – Roubaix. Wat een weelde. Ik hebbe die daegen gien meens klaegen heurd
over de opwaarming van de eerde, mar zag alliend mar fleurige gezichten. Ja,
veur mien pat is de netuur elk jaor zo van streek: et veurjaor kan mi’j niet
vroeg genog beginnen. En wat is d’r op tegen dat de boeren half april de eerste
snee al in de bult hebben? Niks toch. Ja, as die klimaotsveraandering nog even
deurzet hoeven de overwinterers douk niet meer naor Portugal of Spanje, mar kun
ze in heur eigen aachtertuuntien zitten blieven. Dat kost vule minder
vliegeri’je en is daordeur allienig al vule beter veur et milieu.
Mar spietig genog doen wi’j Stellingwarvers niks mit disse veraandering. Zwembad
De Dobbe in Noordwoolde gaot pas op 28 april eupen en het heur de eerste duzend
bezukers al deur de neuze boren laoten. Flexibiliteit is nooit oonze starkste
kaant west. En wat het Appelsche daon om de daggiestoerist die massaal op stap
was te vermaeken? Niks, nul komma nul. Ja d’r was dat weekaende een Bingomiddag
van de Anbo, mar ik gelove nooit dat dat scoort het bi’j de toerist. Ondertussen
had de gemiente et in et haor mit Dijkstra van de Kamelemark omdat die op et
terrein de karren staon lat. Gien kameel te bekennen dus. Och, d’r zal best wel
wat op Dijkstra an te marken wezen, mar of disse striederaosie de oplossing is
om meer toeristen naor Appelsche te haelen, weenske ik toch te betwiefelen.
Gelokkig schient et perbleem now veur de zoemer oplost te wezen.
Daoromme stelle ik veur dat de gemiente nog wat ekstra CO2 de locht inblaost
zodat et ok winters lekker zoemer wodt. Dan hoeft d’r deur de ekstra toeloop ok
gien subsidie meer geven te wodden an de zwembaeden en kan de Kamelemark ok
tussen 1 november en 1 april zonder perblemen deurdri’jen omdat ofpraot is dat
zoemers de karren staon blieven meugen. Ik zie et al veur me:
“Oost-Stellingwarf, ok winters een tropische uutdaeging”. Heerlik!
.......