Ik bin et ni’je jaor kreatief begonnen al zeg ik et zels: Ik hebbe naemelik een “levenslied” schreven. Et kostte wat muuite, mar et is lokt. En omda’k veurige weke in et Drentse Erica speulen mos, he’k et daor dreks mar uutperbeerd. Ik dochte “et giet (mar) zoas et giet,” om mar es een citaot van Ericanees Daniël Lohues an te haelen. En et wonderlike was: et gong biesterbaorlik best. Appie Tjalma, de oold kastelein van et Wapen van Berkoop zol grif zegd hebben: “Traonen in de ogen.” Kotom, een deurslaond sukses. Ni’jsgierig he’k de ere daegs es bi’j ere “levensliedvertolkers” keken, hoe as die dat doen. Now, dat is warkelik een oge-eupener. Want vrotte ik pattietoeren tieden omme mit een tekst, zoas mit mien kolumns van elke keer 371 woorden, of mit mien vassies die a’k logisch perbere op te schrieven, mien veul beroemdere kollega’s hebben daor dudelik minder muuite mit.
Neme now Jannes, wereldberoemd in et piratecircuit. Hi’j zingt in “Dam Dam” (tussen elke riegel komt vier keer Dam Dam):
Jij weet niet wat liefde is
ik heb mij in jou vergist
alles draait alleen om jou
Maar wat je zegt vergeet ik nou
En Jan Smit zingt over “Laura”:
“Kijk ze lacht zonder gevoel, een onbereikbaar doel, wordt er toch nog nagestreefd.
Ruik, de geur van grootse moed, stroomt nog door haar bloed, maar waarom..??”
En in “Eens schijnt de zon” zingt de ideale schoonzeune Frans Bauer:
“Leven zonder liefde, is als huilen zonder traan
Dat kleine beetje aandacht, de zin in ons mooie bestaan
Maar ook jij kunt je hier aan branden
Lijkt 't vuur eens gedoofd
Er lijkt dan zoveel veranderd, totdat iemand je gelooft”.
Ach, ze hebben d’r alle drie en protte sukses mit en waorom ok niet. Een tekst is mar een tekst. Et gaot veural om et gevuul wat as et opropt en daor slaegen die mannen vule beter in as die tekstproezer uut Berkoop. Misschien dat een fan van Jannes et nog wel et beste verwoordt. Et citaot is letterlik overneumen van de fansite van Jannes: “ik vind hem supper goed ik luister hemn elke dag ik hoop dat er nog meer van dit soort liedjes kommen echt supper goed nummer.”