Et is zoveer. Wat bi’jkaans elkeniene in Stellingwarf-Oostaende al lange wus is now einliks naor buten kommen: Plaetselik Belang in Oosterwoolde het totaol gien dreegvlak onder de bevolking. De oflopen keer weren d’r 12 leden op de vergeerdering en dat op een totaole bevolking van bi’jkaans 10.000. Et bestuur wil de verieniging dan ok mar opheffen: een verstaandig, mar toegelieke ok spietig besluut. Aj’ gien dreegvlak hebben kuj’ muuilik as spreekbuize van de bevolking optreden, zoas an now toe, mit de neudige aachterdocht bi’j de gemiente, wel gebeurde.
Mar goed, ondaanks et feit dat de ziepbelle uutmekeer spat is, kuj’ niet ontkennen dat et bestuur heur best daon het om d’r wat van te maeken. As veurbield haele ik even et boekien “Kiek es weeromme” an dat bi’j gelegenhied van et 101 jaorig bestaon in 2006 deur heur uutgeven is. Een alleraorigst boekien veur de schoelekiender in Oosterwoolde al is de titel wel arg veurspellend veur PB now ze douk ok alliend mar weerommekieken kunnen.
PB Oosterwoolde is de eerste die in Stellingwarf-Oostaende et lotien legt. Ze bin daormit veurloper wodden en ik bin bange ok trendsetter. Weren de Plaetselike Belangen vroeger de verienigings, die as een spinne in et web, de touwgies van et dörpsleven in hanen hadden, now bin ze in pattie dörpen nog goed genog veur de bestuurs- c.q. dörpsvisies en as “kontaktpersoon” veur de gemiente. Bestuurslid Sipma klaegde over et beparkte tal vri’jwilligers dat him veur de verieniging inzetten wol, mar toegelieke ziej’ dat honderden meensken aktief binnen in bi’jgelieks de historische verienigings die as gien inkele muuite hoeven te doen om een zael vol te kriegen. Verienigings die as vroeger nog an Plaetselik Belang hongen, bin now zelsstaandige stichtings, die vule regionaoler richt binnen en d’r in slaegen honderden en soms zels duzenden meensken te berikken, zoas in Berkoop “Muziek op Stapel” en “Open Stal”. Zi’j slaegen d’r wel in genog vri’jwilligers te vienen.
In elk geval vereist de aachteruutgang van de PB’s een aandere opstelling van de poletiek en de gemiente. De rondgang die oonze “ni’je” burgemeester Harry Oosterman maekt het langs alle Plaetselike Belangen om een goed bield te kriegen van de gemiente kan dan ok wel es de leste west hebben.