Et begrip verantwoordelikhied staot de leste tied weer volop in de belangstelling. Wie was d’r bi’jgelieks verantwoordelik veur de poletieke ofgang van de PvdA bi’j de leste kaemerverkiezings, de zonuumde “verloren slag”? Doe Ad Melkert in 2002 de verkiezings verleur nam hi’j de verantwoordelikhied en vertrok. En zo heurt et ok: in de poletiek kuj’ winnen en verliezen. Aj’ verliezen of je zin niet kriegen dan vertrek ie. Da’s gien votlopen veur de verantwoordelikhied, mar juust je verantwoordelikhied nemen. Ie laoten daormit de kiezers zien: hier stao ik en ik kan niet aanders. De menisters Donner en Dekker nammen de verantwoordelikhied veur de Schipholbraand en vertrokken. Ok al weren de meerste besluten over de bouw van et cellekompleks neumen deur veurige kabinetten, bi’j zien oftreden stelde Donner: “Een minister is verantwoordelijk voor diensten die onder zijn verantwoordelijkheid vallen.”
Daoromme begriepe ik niet dat d’r gieniene in de gemiente Stellingwarf-Oostaende de verantwoordelikhied op him nemt veur de “verloren slag” mit Jasper. D’r bin ja waratje nog wel een peer raodsleden en wethoolders over die van et begin of an keuzen hebben veur de weg van de konfrontaosie. Die dochten dat ze geliek kriegen zollen bi’j de rechter. Now mooi niet dus en et risseltaot is dat d’r douk as eerste anbetaeling een bedrag van € 450.000 uut de reservepot haeld wodt om Jasper betaelen te kunnen. (Da’s meer as ien miljoen gulden) En da’s nog mar et begin. D’r ligt nog altied een claim van 6 miljoen.
Perbleem is, hoe leg ie dat uut an de meensken. Waoromme mos d’r bezunigd wodden op leerlingevervoer en taxivervoer en is d’r bi’jgelieks nog steeds gien geld veur een keunststofgrösveld veur de körfbalklup in Berkoop? Ja hoe kan et dat d’r inienend wel genog geld is om Jasper betaelen te kunnen?
Op de Plaetselik Belang vergeerdering in Berkoop heurde ik dat d’r op gemientelik nivo et leste jaor niks gebeurd is an een ni’j multikultureel centrum. Nao ofloop van de vergeerdering vreug een veuranstaond lid van die verieniging mi’j: “De gemiente zegt dat de zaeke Jasper totaol gien invloed het op et wel of niet bouwen van dat centrum. Geloof ie dat?” Ik haelde de schoolders op en zweeg. “Now,” zee hi’j, “ikke niet.”