Et liekt wel of alle registers eupengaon bi’j oons in de Zuudoosthoeke. In bi’jkaans elk dörp bin meensken drok doende et dörp op ‘e kaorte te zetten en dat is vanzels prachtig al he’k niet de indrok dat alles liekegoed op mekeer ofsteld is. Dat nemt niet weg dat we bliede wezen meugen mit al die goedbedoelde initiatieven. Neme now bi’jgelieks Oosterwoolde. Jaorenlaank ston dat dörp bekend as et plak waor aj’ dood nog niet liggen wollen, mar tegenwoordig timmert et an de diek en dat niet alliend mit een Gezondhiedscentrum en een ni’j MFA zoas dat tegenwoordig mit een mooi woord hiet. (Daor zitten meerdere schoelen en instaansies in). De historische verieniging lopt him daor ok et vuur uut de sloffen om een historische dörpskuier te maeken en de ondernemers willen as Team Oosterwolde Promotion et dörp broezen laoten en hebben as doelstelling Oosterwoolde binnen drie jaor op de laandelike evenementekelender te kriegen. Toe mar. Et is in elk geval hiel wat beter as je drok maeken over een peer bomen bi’j ‘t ni’je gezondhiedscentrum, zoas de veurzitter van Plaetselik Belang dee. Mi’j donkt dat daor nog wel wat op mekeer ofsteld wodden kan. Komme ik in Appelsche. Dat dörp het een webstee mit de mooie naeme Appelscha Promotie. Ie zollen zeggen dat zoe’n toeristisch dörp de zaeke aorig op ‘e riege het. Now nee dus. De webstee van Appelscha Promotie, was op maendag 18 december 2006, doe schreef ik disse kolumn, bi’jwarkt tot 12 april 2005. Kommentaor overbodig donkt mi’j. Gelokkig bin die van www.regioappelscha.nl en van de VVV hiel wat beter bi’j de tied al vaalt et wel op dat op de aktiviteitekelender van de VVV veur toekem jaor de naeme Appelsche meer as negen keer zo vaeke veurkomt as die van de ere dörpen en dat liekt mi’j toch lichtelik overdreven. In elk geval was de Berkoper webstee op 18 december keurig tot 17 december bi’jwarkt. Hulde. Zol trouwens een dörpecoördinator zoas in Stellingwarf-Westaende ok wat veur ‘t Oostaende wezen? Die kan mit al dat gebroes een protte teleurstellings helpen te veurkommen. In elk geval kuwwe de regiefunktie van de gemiente hierbi’j best bruken. Dus Edelachtbere Heer Sierd en Hoogedelgestrenge Heer Harry, an de bak.